أنا لو في سجنك برضه حر
دا البعد عنك طعمه مر
هو أنتي عامله لي عمل
ولا الوجود جواكي سر
رغم اللي بيا أنا باعشقك
حتي إن كدبتي حاصدقك
لو جاني همسك في المنام
لو كنت ميت هسمعك
أمليني عدل بحكمتك
درويش وعاشق سكتك
يا تمدي إيدك للغريق
يا تسمعيه صوت دعوتك
أخويا في فلسطين جريح
مصلوب وأنا جنبك كسيح
أدعي له ربك يرحمه
أو يرفعه ويا المسيح
لو ع الحقيقه خلاص تعبت
مقدرش أقول م النيل شربت
إزاي أكون خلف البنات
وأنا م الخجل والهم مت
محتاجه يا أم الكون ولد
والقوه مش كتره عدد
لو فرد واحد يسوي ألف
دي ملايكه الرحمن مدد
*************************
